Kryetari i Prishtinës, Përparim Rama ka reaguar pasi ministri në detyrë i Financave, Hekuran Murati ka deklaruar se projekti për ndërtimin e sheshit “Xhorxh Bush” ka nisur pa e pasur buxhetin e nevojshëm të ndarë.

Me anë të një postimi në Facebook, Rama ka publikuar shkresën me kërkesën urgjente për alokimin e buxhetit të kryeqytetit për vitin 2025, që sipas të parit të Prishtinës, i është dërguar dy herë Ministrisë së Financave, përcjell Arbresh.info.

Ndër të tjera, Rama akuzoi Muratin se po rrezikon që qytetarët e Prishtinës të mbesin pa shërbime elementare, ndërsa ka kërkuar nga ministri në detyrë që ti kryej punët e veta.

“Hekuran, duke qenë se prapë iu paske bashkuar shokëve të partisë në aksionin për “bllokim”, ju lutem gjeni pak kohë të shikoni emailin që ju kemi dërguar, dy ditë më parë! Për herë të dytë, ta kemi dërguar kërkesën urgjente për alokimin e buxhetit të Kryeqytetit për vitin 2025, të miratuar nga Asambleja e Kryeqytetit, e që ti vazhdon ta bllokosh. Ti po rrezikon që qytetarët e Kryeqytetit të mbeten pa shërbime elementare ndaj tyre! Kryj punët e tua!”, ka shkruar Rama.

Ndryshe, punimet për ndërtimin e sheshit “Xhorxh Bush” në kryeqytet filluan sot përsëri pas ndërprerjes së tyre për herë të tretë./Arbresh.info

LEXO EDHE:

Murati: Shpallja e tenderit dhe nënshkrimi i kontratës 18 milionë euro për Sheshin Xhorxh Bush është bërë pa pasur buxhetin e nevojshëm